बझाङको दुर्गाथली गाउँपालिका – २ सिमा गाउँका ५१ वर्षीय यज्ञ गिरि विष्टले परम्परागत सोचलाई तोड्दै नवीनतम उद्यमशीलता प्रस्तुत गरेका छन् । उनले मौरिबगरमा बझाङ्गी नेपाली कागज रेसा प्रशोधन गार्मेन्ट उद्योग सञ्चालन गरी स्थानीय स्रोतलाई आधुनिक प्रविधिसँग जोडेर उदाहरणीय काम गरिरहेका छन् ।
यस उद्योगमा, उनले केतुकीको साँप्रा र केराको साँप्राबाट मेसिनको सहायतामा रेसा निकाल्छन् । ती रेसाबाट जुत्ता, कार्पेट, लुगाकपडा, र डोरी जस्ता उपयोगी सामग्री उत्पादन गरिन्छ । उनको यो प्रयासले स्थानीय कच्चा पदार्थको उपयोग वृद्धि गरेको छ ।
यज्ञ गिरिले आफ्नो उत्पादनको लागि काठमाडौँ लगायतका सहरी बजारहरू खोज्दै छन् । यो उद्योग सञ्चालन गर्न दुर्गाथली गाउँपालिकाले २ लाख ५० हजार रुपैयाँ सहयोग गरेको छ, जुन स्थानीय सरकार र समुदायको सहकार्यको उदाहरण हो ।
यज्ञ गिरि बिस्टको सफलताको पछाडि उनको अद्वितीय सोच र निरन्तर प्रयास छ । दुर्गम क्षेत्रका सीमित स्रोत-साधनबिच पनि उनले सम्भावनाहरूको पहिचान गरी आफ्नो सङ्घर्षलाई ठोस परिणाममा बदल्न सकेका छन् ।
उनले पारम्परिक खेती र सीमित आयस्रोतलाई चुनौती दिँदै वातावरणमैत्री उत्पादनतर्फ ध्यान केन्द्रित गरेका छन् । सप्रा प्रशोधन र यसको उत्पादकत्व बढाउने मेसिनरी प्रयोगले उनलाई उद्यमशीलताको नयाँ उचाइमा पुर्याएको छ।
स्थानीय विकास र पर्यावरण संरक्षणमा योगदान
यस उद्योगले स्थानीय कच्चा पदार्थको सदुपयोग गर्दै वातावरणमैत्री उत्पादनको प्रवर्द्धन गरेको छ । यसले गाउँमा सीपमूलक तालिम र रोजगारीको अवसर समेत सिर्जना गरेको छ। यज्ञ गिरि बिस्टको यो सोचले बझाङको ग्रामीण क्षेत्रलाई आर्थिक सशक्तीकरणतर्फ अग्रसर गराउने र युवाहरूलाई स्थानीय स्रोतकै उपयोग गरेर उद्यमशील बन्न प्रेरणा दिने सम्भावना बोकेको छ ।
“मिहिनेत र नयाँ सोच कहिल्यै व्यर्थ जान्दैन” भन्ने सन्देश बोकेको यज्ञ गिरि बिस्टको यो प्रयास बझाङकै मात्र नभई समग्र दुर्गम क्षेत्रका लागि उदाहरणीय छ। उनीजस्ता व्यवसायीहरूका लागि स्थानीय देखि राष्ट्रिय स्तरमा बजार र सहयोग प्रणालीको विकास गरिनु जरुरी छ । जसले ग्रामीण उद्यमशीलता र विकासको गति थप बलियो बनाउनेछ।
