नेत्र विक्रम चन्द (विप्लव) नेतृत्वको नेकपा माओवादी निकट विधार्थी संगठन अखिल (समाजवादी) का केन्द्रीय महासचिव, प्रकाश जप्रेल नेकपा प्रवेश गरेका छन् । उनी सहित शिरञ्जीवी सी, सुमन सी, रोशन सी, साहिल सी, विकान्त सी, भुवन सी, सचिन सी, सोनम सी, प्रदीप सी, रमेश सी, धनमान सी, रविन्द्र सी, लक्ष्मण सी, राजन सी, गोकुल सी, विश्व सी, प्रकाश सी, रोजिना सी, दिपेश सी, रुपक सी, जयाराम सी, विश्वराम सी, केदार सी, सन्तोष सी, विक्रम सी र रोबन सी लगायतका नेताहरू बामपन्थी आन्दोलनको ध्रुवीकरणको क्रममा पुष्पकमल दाहाल ‘प्रचण्ड’ नेतृत्वको नेपाली कम्युनिस्ट पार्टी (नेकपा) मा प्रवेश गरेका हुन् ।
नेकपा (विप्लव) निकट विद्यार्थी संगठन अखिल (समाजवादी) का केन्द्रीय महासचिवजस्तो महत्वपूर्ण जिम्मेवारी सम्हाल्दै आएका प्रकाश जप्रेलसहितको सामूहिक प्रवेशलाई समग्र बामपन्थी आन्दोलनको दिशा र भविष्यसँग जोडेर हेरिएको छ ।
लामो समयदेखि विद्यार्थी, युवा तथा संगठन निर्माणको मोर्चामा सक्रिय यी नेताहरूको निर्णयले वैचारिक स्पष्टता, राजनीतिक परिपक्वता र व्यवहारिक एकताको सन्देश दिएको विश्लेषकहरू बताउँछन् ।
यो घटनालाई राजनीतिक रूपमा विप्लव नेतृत्वको माओवादीका लागि गम्भीर झड्का का रूपमा मूल्यांकन गरिएको छ । संगठनात्मक रूपमा प्रभावशाली युवा नेतृत्व र सक्रिय कार्यकर्ताहरूको एकैपटक प्रचण्ड नेतृत्वको नेकपामा प्रवेश हुनु बाम आन्दोलनभित्रको शक्ति सन्तुलनमा महत्वपूर्ण परिवर्तनको संकेत मानिएको छ ।
अर्कोतर्फ, यस प्रवेशलाई नेपाली कम्युनिस्ट पार्टीका लागि संगठन विस्तार, जनआधार सुदृढीकरण र बाम एकताको अभियानमा ठूलो उपलब्धिका रूपमा हेरिएको छ ।
विशेषगरी बझाङ, दार्चुला, जुम्ला तथा काठमाडौँ उपत्यकामा प्रभाव राख्ने यी नेताहरूको सहभागिताले सुदूरपश्चिमदेखि केन्द्रसम्म बामपन्थी आन्दोलनलाई नयाँ गति दिने अपेक्षा गरिएको छ । विद्यार्थी र युवा आन्दोलनबाट खारिएका, जनसंघर्ष र संगठन निर्माणमा अनुभवी यी व्यक्तिहरूको प्रवेशले प्रचण्ड नेतृत्वको नेकपाभित्र युवा पुस्ताको आकर्षण बढ्ने र बामपन्थी ध्रुवीकरण अझ तीव्र हुने विश्वास व्यक्त गरिएको छ ।
समग्रमा, यो सामूहिक प्रवेशलाई बाम आन्दोलनको नयाँ चरण, वैचारिक पुनर्संरचना र संगठनात्मक एकताको दिशामा एक महत्वपूर्ण राजनीतिक घटनाक्रमका रूपमा हेरिएको छ ।