भाडसैनकी १९ वर्षीया छात्रा मञ्जु धामी बिहानै पानीको डोको बोकेर घर फर्किन्छिन् । घर फर्केर उनले हात मुख धोएपछि तुरुन्तै किताब खोल्छिन् । “हामीजस्ता गाउँमा बस्ने छोरीहरूले क्याम्पस पढ्न टाढा पुग्नुपर्थ्यो,” मञ्जु भन्छिन्, “अब भने घरमै पढ्न पाउने सपना पूरा हुन लागेको छ ।” उनी हाल त्रीवेणी क्याम्पस बिजगडमा अध्ययनरत छन् ।
मञ्जु जस्तै सयौं युवाहरूको मुहारमा अहिले हर्षको झल्को छ । बझाङको विकट क्षेत्र मानिने केदारस्युँ गाउँपालिका–०६, भाडसनैमा बाह्रदेउ क्याम्पसको स्थापना भएपछि स्थानीयबासीमा खुशी छाएको छ । सोमबार सुदूरपश्चिम विश्वविद्यालयसँग सम्बन्धन प्राप्त बाह्रदेउ क्याम्पसको भव्य उद्घाटन समारोह सम्पन्न भएको हो ।
कार्यक्रममा केदारस्युँ गाउँपालिकाका अध्यक्ष गणेश बोहरा, उपाध्यक्ष मनिशा धामी, सुदूरपश्चिम विश्वविद्यालयका डिन, स्थानीय जनप्रतिनिधि, अभिभावक, विद्यार्थी र सरोकारवालाहरूको उल्लेख्य सहभागिता थियो ।
हाम्रो गाउँका छोराछोरी सहर धाउनुपर्दैन
उद्घाटन समारोहमा गाउँपालिका अध्यक्ष गणेश बोहराले क्याम्पसको स्थापनालाई ऐतिहासिक उपलब्धि भन्दै स्थानीय शिक्षा सुधारका लागि आर्थिक सहयोगको घोषणा गरे ।
“हाम्रो उद्देश्य गाउँमै उच्च शिक्षा दिनु हो । अब हाम्रो गाउँका छोराछोरीले सहर धाउनुपर्ने छैन,” उनले भने ।
नयाँ पुस्ता गाउँमै पढेर नेतृत्वमा आउन सक्छ
उपाध्यक्ष मनिशा धामीले विशेष गरी ग्रामीण बालिका र किशोरीका लागि क्याम्पस स्थापनालाई ठूलो अवसर भएको बताइन् । “पहिले टाढाको कारणले कतिपय बालिकाले पढाइ बीचमै छोड्नुपर्थ्यो । अब उनीहरू गाउँमै पढेर शिक्षक, नर्स वा स्थानीय नेता बन्न सक्छन्,” उनले भनिन् । दुर्गम क्षेत्रमा शिक्षा विस्तारलाई गाउँपालिकाको पहिलो प्राथमिकता भएको बताइन् ।
“दुर्गमसम्म शैक्षिक पहुँच विस्तार र शिक्षाको गुणस्तर सुधार हाम्रो प्रमुख एजेन्डा हो । यो क्याम्पस सञ्चालन र सुदृढ बनाउन हामी अहोरात्र खटिनेछौं,” उपाध्यक्ष धामीले दृढ प्रतिबद्धता व्यक्त गरिन् ।
सुदूरपश्चिमको शैक्षिक पहुँच विस्तार हाम्रो लक्ष्य हो
सुदूरपश्चिम विश्वविद्यालयका डिन भवानी सिङ चलाउनेले क्याम्पसको सम्बन्धन सुदूरपश्चिमका दुर्गम गाउँसम्म शैक्षिक अवसर पुर्याउने अभियानको हिस्सा भएको बताए । “हामी सहरमुखी शिक्षा प्रणालीलाई गाउँमुखी बनाउँदैछौं । भाडसनैको बाह्रदेउ क्याम्पस यस दिशामा एउटा महत्वपूर्ण कदम हो,” डिन चलाउनेले भने ।
स्थानीयको खुशी र आशा
स्थानीय बासिन्दाहरूले अब आफ्ना सन्तानले घरमै उच्च शिक्षा पाउने हुँदा गहिरो सन्तोष व्यक्त गरेका छन् । भाडसैनका अभिभावक लालबहादुर धामी भन्छन्, “छोराछोरीलाई टाढा पठाउँदा बसाइँ, खर्च र असुरक्षाको डर हुन्थ्यो । अब गाउँमै पढ्न पाउने भएपछि हामी धेरै हर्षित भएका छौं ।”
विकटताबाट विकासोन्मुखतर्फ
पहाडको गोठालो गाउँमा अब शिक्षा र अवसरको उज्यालो देखिन थालेको छ । बाह्रदेउ क्याम्पसले पढाइको अवसर मात्रै नभइ गाउँका युवामा आत्मविश्वास र सम्भावनाको ढोका पनि खोलेको छ ।
मन्जु धामिले अन्त्यमा भनिन्, “अब हामीले पनि टाढा जानुपर्ने बाध्यता हटेको छ । गाउँमै पढेर गाउँकै लागि केही गर्न सक्छौं । बाह्रदेउ क्याम्पस हाम्रो भविष्यको ढोका बनेको छ ।”
