कास्की: माछापुच्छ्रे गाउँपालिका – ७ मा अवस्थित पृथ्वीनारायण माध्यमिक विद्यालयमा स्वर्गीय रतनसिंह तमु र तिर्थकुमारी तमुको स्मृतिमा ‘रतनसिंह तथा तिर्थकुमारी तमु अक्षय कोष’ स्थापना गरिएको छ । विद्यालयमा अध्ययनरत आर्थिक रूपमा कमजोर, लगनशील तथा जेहेन्दार विद्यार्थीहरूलाई दीर्घकालीन रूपमा सहयोग पुर्याउने उद्देश्यले २ लाख ५० हजार रुपैयाँको अक्षय कोष स्थापना गरिएको हो ।
अक्षय कोष जेठा छोरा बद्रीप्रसाद तमु, बुहारी रामकुमारी तमु तथा छोरी पत्रकुमारी तमु ले संयुक्त रूपमा स्थापना गरेका हुन् । कोषमा २ लाख ५० हजार रुपैयाँ प्रदान गरिएको छ । बद्रीप्रसाद तमुको ८४ औँ पूजाको उपलक्ष्यमा यो सामाजिक तथा शैक्षिक योगदान गरिएको हो ।
अक्षय कोषका संस्थापक तमु परिवार कोषको जन्मथलो माछापुच्छ्रे गाउँपालिका–७, कोटगाउँ, धम्पुस रहेको छ । हालको ठेगाना भने पोखरा–२७ हो ।
तमु परिवारका अनुसार, स्वर्गीय बुवा-आमाको स्मृतिमा विद्यालयमा अध्ययनरत विद्यार्थीलाई सहयोग पुर्याउन कोष स्थापना गरिएको हो । कोषको ब्याजबाट हरेक वर्ष विद्यालयमा अध्ययनरत आर्थिक रूपमा कमजोर, लगनशील तथा जेहेन्दार विद्यार्थीहरूलाई छात्रवृत्ति सहयाेग प्रदान गरिने योजना छ ।
अक्षय कोष स्थापना कार्यक्रम विद्यालय परिसरमै एक औपचारिक समारोहका रूपमा सम्पन्न गरिएको थियो । कार्यक्रममा पृथ्वीनारायण क्याम्पस, पोखराका सेवानीवृत्त सह–प्राध्यापक टेकबहादुर गुरुङ, विद्यालय व्यवस्थापन समितिका अध्यक्ष (विब्यस) यामबहादुर गुरुङ, शिक्षक–अभिभावक समितिका निवर्तमान अध्यक्ष प्रकाश गुरुङ, समाजसेवी लोकबहादुर गुरुङ लगायत स्थानीय समाजसेवी, अभिभावक, शिक्षक र विद्यार्थीहरूको उल्लेखनीय उपस्थिति थियो ।
वक्ताहरूले तमु परिवारले देखाएको सामाजिक उत्तरदायित्व र विद्यालयप्रतिको प्रतिवद्धताको प्रशंसा गर्दै यस प्रकारका अक्षय कोषहरूले विद्यालयको शैक्षिक गुणस्तर उकास्न महत्वपूर्ण योगदान गर्ने धारणा राखे ।
समारोहमा बोल्दै विद्यालयका प्रधानाध्यापक बुद्धिबहादुर मिजारले तमु परिवारप्रति हार्दिक आभार व्यक्त गरे । उनले विद्यालयले लामो समयदेखि आर्थिक अभावमा रहेका विद्यार्थीको सहयोगका लागि व्यवस्था खोजिरहेको बताउँदै, तमु परिवारको योगदानले विद्यालय र विद्यार्थीहरूलाई ठूलो प्रेरणा मिल्ने उल्लेख गरे ।
