रास्वपाप्रति इंगित गर्दै कांग्रेस महामन्त्री विश्वप्रकाश शर्माले भने, ‘चुनावमा जाँदा नो नट अगेन, कुनै यी देखिएका बूढा अनुहार प्रधानमन्त्री बन्नुहुन्न? अनि कहिले बालुवाटार कहिले खुमलटार, अहिले त अगेन एन्ड अगेन, सरकारमा फेरि पनि फेरि पनि ।’
नयाँ राजनीतिक दलहरू कल्पनाको आकाशबाट वास्तविकताको धरातलमा ल्याउन प्रधानमन्त्री पुष्पकमल दाहालले भूमिका खेलेको कांग्रेस महामन्त्री विश्वप्रकाश शर्माले बताएका छन् ।
प्रधानमन्त्रीले संसद्मा राखेको विश्वासको प्रस्तावको विपक्षमा बोल्दै सांसद शर्माले नयाँ राजनीतिक दलहरू परिपक्व हुँदै गएको बताएका छन् । पुराना नेताहरूलाई अब प्रधानमन्त्री बनाउनुहुन्न भन्नेहरू तिनै नेताहरूलाई प्रधानमन्त्री बनाउन कुदिरहेको शर्माले बताए ।
नयाँ दल बनाएर बडो उत्साहका साथ आएका साथीहरूको उत्साहलाई सम्मान गर्नुपर्छ । नयाँ दललाई कल्पनाको आकाशबाट वास्तविकताको जमिनमा ल्याउनुभएको छ, व्यवहारिक बनाउन खोजेको अवस्था छ । उत्साह हुन्छ, हुनुपर्छ तर त्यो व्यवहारिक जमिनमा आउनुपर्छ, शर्माले थपे, चुनावमा जाँदा नो नट अगेन, कुनै यी देखिएका बूढा अनुहार प्रधानमन्त्री बन्नुहुन्न? अनि कहिले बालुवाटार कहिले खुमलटार, अहिले त अगेन एन्ड अगेन, सरकारमा फेरि पनि फेरि पनि ।
नयाँ राजनीतिक दलहरूलाई सरकारमा सहभागी गराउँदा ती दलहरू परिपक्व बन्ने शर्माले बताए ।
मिसन २०८४ लिएर हिँडिरहेका नयाँ दलहरूलाई वर्तमानतिर ध्यान दिन पनि उनले सुझाएका छन् । यो देशमा केही भएको छैन, २०८४ मा हामी आउँछौं र बनाउँछौं भन्ने दलहरू विभिन्न परियोजनाको पदयात्रामा जाँदा देशमा केही भएको होइन कि केही भइरहेको छ तर ढिलो भइरहेको छ भन्ने उनीहरूमा ज्ञान आएको शर्माले बताए । मुलुक निर्माणका लागि सबै मिलेर अघि बढ्नुपर्ने पनि शर्माको आग्रह थियो ।