प्रधानमन्त्री शेरबहादुर देउवाले जनता समाजवादी पार्टी (जसपा)का चार मन्त्री बर्खास्त गरेका छन् । प्रधानमन्त्री देउवाको सिफारिसमा राष्ट्रपति विद्यादेवी भण्डारीले चार जना मन्त्री हटाएकी हुन ।
चार वटै मन्त्रालयको कार्यभार प्रधानमन्त्री देउवाले सम्हाल्ने गरी तोकिएको छ । देउवा नेतृत्वको सरकारमा जसपाबाट संघीय मामिला तथा सामान्य प्रशासनमन्त्री राजेन्द्र श्रेष्ठ, भौतिक पूर्वाधारमन्त्री मोहम्मद इस्तियाक राई, वन तथा वातावरणमन्त्री प्रदीप यादव र कृषि तथा पशुपक्षी मन्त्री मृगेन्द्रकुमार सिंह सहभागि थिए ।
श्रेष्ठ सरकारमा पार्टीको नेतृत्व गर्दै ०७८ असोजमा मन्त्री बनेका थिए भने इस्तियाक, प्रदीप र मृगेन्द्रकुमार असार २० गतेको मन्त्री परिषद पुनर्गनमा मन्त्री बनेका थिए । जसपाले गठबन्धन तोडेर नेकपा एमालेसँग चुनावी गठबन्धन गरेपछि देउवा रुष्ट थिए ।
सत्ता गठबन्धनमा रहेको जसपाले २२ असोजमा एमालेसँग चुनावी तालमेलको सहमति गरेको थियो । तर, मन्त्रीहरूले भने राजीनामा दिएका थिएनन् । सत्ता गठबन्धनका नेताहरूले जसपाका मन्त्रीहरू हटाउनुपर्ने पक्षमा थिए ।