अपि हिमाल गाउँपालिकाको विकासका लागि शीर्ष नेताहरूलाई ज्ञापन पत्र हस्तान्तरण

दार्चुलाको अपि हिमाल गाउँपालिकाका अध्यक्ष भक्त सिंह ठेकरे नेतृत्वको टोलीले अन्तर स्थानीय सरकार अनुभव आदानप्रदान तथा अध्ययन अवलोकन भ्रमणलाई सफलतापूर्वक सम्पन्न गरेको छ । भ्रमणका क्रममा टोलीले गाउँपालिकाका विभिन्न समस्याहरू समाधानका लागि प्रमुख राजनीतिक दलका शीर्ष नेतृत्वहरूसँग भेटघाट गरी ज्ञापन पत्र बुझाएको हो ।

अध्यक्ष ठेकरेले नेकपा (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’ र नेपाली काँग्रेसका सभापति तथा पूर्व प्रधानमन्त्री शेरबहादुर देउवालाई ज्ञापन पत्र बुझाएका छन् । यस ज्ञापन पत्रमा खण्डेश्वरी मुकामसम्म सडक निर्माण, वडा नं. ३ विभाजन गरी थप वडा बनाउने, र पालिकाका विभिन्न भागमा विद्युतीकरणका लागि पहल गर्न माग गरिएको छ ।

प्रधानमन्त्री तथा नेकपा एमालेका अध्यक्ष केपी शर्मा ओली र सम्बन्धित विभागीय मन्त्रीहरूसँग भेटघाट गर्ने योजना भए पनि कार्य व्यस्तता र समय अभावका कारण भेट हुन नसकेको अध्यक्ष ठेकरेले जानकारी दिएका छन् । तथापि, सम्बन्धित निकायमार्फत ज्ञापन पत्र हस्तान्तरण गरी आवश्यक पहलहरू अगाडि बढाइएको उनले बताए ।

समग्रमा अपि हिमाल गाउँपालिकाका समस्या समाधानका लागि प्रमुख राजनीतिक दलका शीर्ष नेताहरूले सकारात्मक प्रतिबद्धता व्यक्त गरेका छन् । अध्यक्ष ठेकरेले यस कार्यमा साथ दिनुहुने सम्पूर्ण प्रतिनिधिहरूप्रति आभार व्यक्त गर्दै गाउँपालिकाको विकास र समृद्धिका लागि सबैले सहकार्य गर्नुपर्ने बताएका छन् ।

Loading...